1 patay, 1 angol sa pagpamusil

CEBU, Philippines - Usa ang patay, samtang usa ang angol sa nahitabong pagpamusil sa managlahing oras ug lugar sa syudad sa Sugbo kagahapon sa kaadlawon.

Ang namatay wala hiilhi sa kapolisan ug wala usab hiilhi ang mipusil niini, samtang ang angol mao si Vicente Felix Cacerna, 26, nga taga Panagdait Compound, barangay Kasambagan.

Ang nakakita sa namatay nga biktima didto sa dalan C. Padilla sa barangay Duljo-Fatima, kagahapon sa alas 2.45 sa kaadlawon, mao si Larry Camero, 46, nga barangay tanod sa maong lugar. Matud pa ni Camero nagkamang sa karsada nga dugoon ang lawas sa biktima ug dihang ila kining gihatod sa tambalanan, gideklalrar nga patay na sa paghiabot didto.

Samtang si Cacerna nga samdan sa   kilid sa iyang lawas giluthang ni Admason Delantes, 30, nga iyang silingan sa alas 3:30 sa kaadlawon.

Misuway og ikyas si Delantes apan nadakpan ra siya sa kapolisan nga migukod kaniya busa mikagulkol dayon siya sa prisohan samtang ang biktima anaa pa sa tambalanan. (BANAT NEWS)