Kapitolyo motabang sa mga mag-uuma

CEBU, Philippines - Si Gobernador Gwendolyn Garcia mibutyag nga ang kagamhanan sa lalawigan sa Sugbo andam nga motabang sa mga mag-uuma kansang mga umahan naapektohan sa baha.

Kini naggumikan sa walay bugto nga pag-uwan niining buwana   sa tibuok lalawigan sa Sugbo nga nakaapektar sa kaumahan ug mga tanom sa mga mag-uuma.

Sumala sa gobernador nga iya nang gimandoan si   provincial board member Alex Binghay sa ikatulo nga distrito kinsa maoy chairman sa committee on agriculture and livelihood sa hunta probinsiyal nga ipaasikaso dayon ang mga mag uuma ilabi na gayud ang mga naapektohan sa grabeng ulan ug baha .

Samtang si Binghay nagkanayon nga iya na usab gilihok ang gimando sa gobernadora inabagan sa mga opisyales ug mga kawani sa provincial agriculture’s office.

Dugang pa ni Binghay nga ang labing naapektohan sa mga pagbaha mao ang mga mag-uuma nga anaa nahimutang sa kapatagan.

Matud pa ni Garcia nga dili siya makaako nga magsud-ong sa makalolooy nga kahimtang sa mga mag-uuma nga kawad-an sa ilang mga panginabuhi.

Nakita usab sa gobernador nga nanginahanglan og tabang ang mga biktima sa katalagman nga mugna sa kinaiyahan busa andam kaayo siyang motabang sa mga hingtungdan. (BANAT NEWS)