CEBU, Philippines - Samdan ang usa ka lalaki human kini pusila sa mga tulisang de motor didto sa Elizabeth Compound, Barangay Camputhaw, dakbayan sa Sugbo kagahapon pasado alas 12:30 ang takna sa kaadlawon.
Ang biktima giila nga si Edsel Sevilles, 28, nga nagpuyo sa maong lugar.
Matud pa ni Maribel Sevilles, asawa sa biktima nga naglakaw silang duha uban sa iyang bana paingon sa ilahang balay gikan sa trabaho dihang kalit lang mihunong sa ilang tungod ang usa ka motorsiklo nga gilulanan sa duha ka wala hiilhing lalaki.
Unya diha-diha mideklarar kining tulis dayong labni sa shoulder bag ni Sevilles.
Apan gumikan kay may pribadong awto nga mihunong sa ilang duol, wala makuha ang bag, apan gipusil niini ang biktima dayong pasirit og padagan sa ilang motorsiklo pahilayo sa maong lugar.
Ang biktima kinsa nasabak sa walang kilid, daling gihatod sa iyang asawa ngadto sa tambalanan. Padayon pang gipangita sa kapolisan ang mga tulisan. (BANAT NEWS) v