Quisumbing mihatag school supply sa nabahaan

CEBU, Philippines - Personal nga nanghatag og school supply si 6th district Congressman Gabriel Luis Luigi Quisumbing ngadto sa mga tinun-an sa elementarya nga nabiktima sa grabing baha sa miaging semana.

Ang nakadawat sa maong mga school supply mao ang mga tinun-an sa Mayor A.S. Fortuna Memorial Elementary ug Basak Element School sa dakbayan sa Mandaue.

Matud pa ni Quisumbing nga gidali niya ang pagpanghatag sa maong mga supply human niya masayri ang problema sa mga nagtunghang mga kabataan nga dili na sila makapadayon sa pag-eskuyla kay nabasa sa baha ang ilang mga libro ug ubang mga school supply.

Aron dili maundang sa ilang pagtungha, si Quisumbing miadto sa mga classroom ug personal nga mitunol sa maong mga school supply kauban si Engr. Santiago Suico ang District Engineer sa sixto distrito kinsa mi-assess sa kadaot sa mga apektadong classroom ug mideterminar sa danyos niini aron dalion usab sa pag-ayo ug dili mabalda ang mga klase niini.

Samtang ang mga magtutudlo sa maong eskuylahan mihangyo usab kang Quisumbing nga unta madugangan pa ang ilang classroom ug ingon man electric fan ilabi na karong nagsugwak na ang gidaghanon sa mga batang nagtungha sa maong dapit.

“While the government is faced with so many problems and the funds are always short to meet all expectations, yet education and the safety and security of our school children that are placed in peril due to unpredictable weather conditions should always be made a top priority”, sigun pa ni Quisumbing. (BANAT NEWS)