Drug pusher gipusil sa vigilantes?

CEBU, Philippines - Gidudahang mga vigilante ang tulo ka wala hiilhing mga lalaki nga nagmotorsiklo ug mipusil angol sa suspetsadong drug pusher didto sa barangay Aliwanay lungsod sa Balamban sa miaging gabii.

Ang biktima mao si Oliver Villahermosa, hingkod, ulitawo nga taga Aliwanay ug nabaniog nga tigbaligya og ginadiling drugas, samtang ang tulo nga miluthang kaniya nagbangot o nagtaptap og panapton sa ilang nawong busa walay nakaila kanila.

Si PO3 Rolando Navarro, desk officer sa Balamban Police mibutyag sa Banat News nga naglingkod- lingkod ang biktima sa gawas sa usa ka sari-sari store sa ilang silingan dihang kalit lang mihunong ang usa ka motorsiklo nga giluwanan sa tulo ka tawo.

Unya walay daghang pangutana nagdungan og lanit sa ilang armas de fuego ang duha ka angkas dayon giluthang sa lima ka higayon ang biktima.

Matud ni PO3 Navarro susama gyud sa description sa vigilante ug ang estelo sa pagpamusil nila sa biktima.

Gihatod dayon ang biktima ngadto sa Balamban District Hospital samtang padayong gipangita sa kapolisan ang mga kriminal. (Uban sa report nila ni Brenda D. Batuto ug Kristel Cordero, SWU) (BANAT NEWS)