Digal gidapigan ni Gen. Ontog

CEBU, Philippines - Gipanalipdan ni PRO-7 Chief Supt. Ager Ontog ang pangulo sa kapulisan sa probinsya nga si Sr. Supt. Erson Digal kabahin sa plano ni Mayor Ricky Ramirez sa lungsod sa Medellin nga palagputon ang naulahi subay sa kasuko sa mayor human siya gitumbok nga maoy prime suspek sa kamatayon sa iyang lider sa mayor Squad nga si Edelberto Abao.

Si Ontog sa dihang nahinabi sa mga tigbalita nagkanayon nga wala siyay nadawat nga pormal nga suwat reklamo ni Ramirez nga nag-awhag ni Digal sa pagparelibo niini sa katungdanan isip pangulo sa kapulisan sa probinsya.

Si Ontog miingon nga ang kaso karun batok ni Ramirez nasang-at na sa korte sa mga imbestigador sa Criminal Investigation and Detection Group (CIDG)-7 human masuta sa imbestigasyon nga ang mayor nakaigo kang Abao niadtong Disyembre 27 sa miaging tuig samtang kini naghigda sa merkado publiko sa maong lungsod pasado alas-11 sa gabii human ang mayor giingong dunay gipusil nga iring.

Apan si Ontog mitataw nga nakadungog lang siya sa mga pasangil ni Ramirez batok kang Digal apan kun interesado kining mopadangat sa iyang reklamo mahimong iduso niini ngadto sa hingtungdang ahensya o kaha sa iyang buhatan aron ma-imbestigahan si Digal.

Siya miklaro nga wala gyud siya’y nakitang kalapasan nga nahimo ni Digal sa pagdumala niini sa kapulisan sa probinsya hinungdan nga walay basehan nga palagputon si Digal sa maong katungdanan.

Gipasabot niini nga gipasa ni Digal ngadto sa CIDG-7 ang imbestigasyon sa kamatayon ni Abao aron pagwagtang sa pagduda nga dunay bias ang kapulisan sa probinsya sa ilang imbestigasyon batok ni Ramirez.

Giklaro ni Ontog nga andam siyang mosuporta ug manalipod sa iyang mga sakop ilabi na kung ang tuyo sa mga reklamante mao ang pagpang-harass tungod kay mihimo sila sa ilang trabaho.

Matud ni Ontog dunay mga sakop sa legal team ang PRO-7 nga moabag sa kapulisan kun makasugat og problema may labot sa ilang trabaho. (BANAT NEWS)