Cebu City 'state of calamity' na, mayores gihagit

CEBU, Philippines - Gideklarar sa Konseho sa dakbayan sa Sugbu nga ipaubos ang tibuok dakbayan sa state of calamity aron makapagawas sa calamity fund aron matabangan ang mga naapektahan sa baha ug makapalit og gamit alang sa subling pagtumaw sa susamang katalagman.

Ang nagrabehang gibahaang barangay sa dakbayan mao ang Kalunasan, Mabolo, Basak-Pardo, Buhisan, Pulangbato, Mambaling, Talamban, Guadalupe, Apas, Pahina-Central ug Inayawan.

Ang dakbayan adunay P200 milyones nga calamity fund alang karong tuiga ug pahatan kini aron ipalit og rubber boats, suction pumps ug uban pa.

Samtang gihagit ang mga mayor sa kalungsoran dinhi sa lalawigan sa Sugbo nga mohimo og 24-oras nga monitoring sa ilang mga dapit taliwala niining way hunong nga pag-uwan gikan pa sa milabay’ng semana.

Mao kini rekomendasiyon sa Philippine Atmospheric, Geophysical and Astronomical Service Administration sa Mactan atol sa gipahigayong tigom tali sa mga sakop sa technical working committee sa Regional Disaster Risk Reduction Management Council (RDRRMC) sa milabay’ng hapon human napanglantawan nga molanat pa hangtud karung bulan sa Marso ngadto na sa bulan sa Mayo ang masinating dili ordinaryong pag-uwan.

Matud ni Esterlita Escanan ang Provincial Coordinator sa RDRRMC gimanduan ang tanang mga mayor sa kalungsoran apil na dinhi sa Metro Cebu Area nga gawas sa subsob nga monitoring gipaandam ang tanang rescue personnel og mga kagamitan sa pagtubag sa kalamidad.

Gipabantayan karon ang tanang kasapaan ug ubang dapit diin magpuyo ang mga tawo nga duol sa peligro.

Sa labing uwahing report nga nadawat sa RDRRMC sukad kagahapon sa hapon moabot og 11 ka mga barangay dinhi sa dakbayan sa Sugbo ang apektado sa pagbaha ug ginagmay’ng pagdahili sa yuta, upat ka mga barangay sa dakbayan sa Mandaue, Lapulapu ug siyudad sa Talisay.

Samtang didto sa lalawigan sa Bohol, 29 ka mga barangay gikan sa walo ka mga lungsod ang apektado sa pagbaha ug nakaguba sa mga pananom ug fishpond.

Sa Negros Occidental dunay duha ka batan-ong nalumos patay sulod ning semanaha taliwa sa pagbunok sa uwan sa lungsod sa Bacong diin ang mga nalumos patay mao si Michael Balansag Inoferio, 22, ug Jovie Rocamora, 22, mga molupyo sa maong lugar nga gianod sa dagkung bawod human niuban pagpangaligo sa dagat.

Samtang subling gimandoan ni Sr. Supt. Erson Digal ang kapolisan sa kalungsoran nga mangandam sa search and rescue operations.

Sa lungsod sa Alegria, nakabkaban na og duha ka dupa ang kongkretong provincial road sa barangay Compostela ug peligro nang agian sumala pa sa hepe sa kapolisan nga si Insp. Daniel Comision nga gikahinabi sa Banat News.

Matud pa ni Comision gibutangan na nila kini karon og signage nga nagpahibalo sa peligro ang maong dalan sanglit bung-aw na ang kilid niini nga may giladmong 300 ngadto sa 400 metros.

Samtang gihangop ni Lapulapu City Mayor Paz Radaza ang sugyot ni Cebu City Mayor Michael Rama nga magtagbo ang tanang mga mayores sa Metro Cebu aron solusyonan ang problema sa baha. Plano ni Radaza pagpahigayon og "Environmental Summit" sa tanang mga opisyal sa Metro Cebu ug probinsya.

Kagahapon sa report sa TV Patrol Central Visayas sa ABS-CBN adunay pipila ka flights ang gi-divert ngadto sa ubang tugpahanan gumikan sa nasinating ‘zero visibility’ gumikan sa pag-uwan dinhi sa Sugbu. Pipila sa mga abyon adto na gipatugpa sa Davao.

Samtang natanggong usab ang 33 ka pamilya sa sitio Cambawog sa barangay Pulangbato ning dakbayan sa Sugbu human maanod ang kawayang taytayan nga ilang agian. (BANAT NEWS)