Bata, ginang naghikog

CEBU, Philippines - Usa ka 13-anyos nga batang lalaki ang giingong naghikog human gikatahong wala paliti og laptop samtang usa ka ginang usab ang nagbitik sa iyang liog gamit ang pisi sa duyan sa iyang anak diha sa dakbayan sa Mandaue.

Nagbitay nang nakit-an sa inahan pasado alas-6 sa miaging gabii ang Grade 5 nga tinun-an sa usa sa mga barangay sa lungsod sa Moalboal dihang iyaha na unta kining dapiton alang sa panihapon.

Base sa inisyal nga imbestigasyon sa kapolisan sa Moalboal nasayran nga ang inahan sa bata natingala nganong wala kini motubag sa iyang pagsangpit hinungdan nga iya kining gisusi sa lawak.

Nakurat nalang siya nga nagbitay na kini nga may hikot nga nylon sa liog nga gigaid diha sa kahoy sa ilang atop, patay na kini pag-abot sa Badian District Hospital. Sa pakighinabi sa Banat News kang PO1 Eric Bongbong nga usa sa mga miresponde sa maong hitabo nga base sa nakuha nilang impormasyon gikan sa mga higalang silingan sa bata nga mibahad kining maghikog kun dili siya mapalitan og laptop sa iyang inahan.

Nasuta nga ang mga higala niini nangangkong adunay kaugalingong mga laptops ug naibog kini hinungdan nga buot magpapalit niini sa miaging semana.

Sa laing bahin, napalgang patay sa iyang kapuyo ang usa ka Jecel Hinampas Bual, 23, diha sa Jumao-as Compound sa sitio Locatha, barangay Looc sa dakbayan sa Lapulapu kagahapon sa buntag.

Sa imbestigasyon ni SPO2 Ernesto Francisco ug PO1 Franklin Bulaquia sa Crime Against Persons Desk sa kapolisan sa Lapulapu nakit-an ni Jenrey Llamas Baquerfo, 24, kapuyo ni Bual nga nagbitay na kini sa pisi sa duyan sa ilang 3-anyos nga anak.

Sumala pa sa gitug-an ni Baquerfo sa kapolisan nga gisultihan siya ni Bual nga aduna kini gihambing sakit ug nagproblema sa iyang mga ginikanan. (BANAT NEWS)