CEBU, Philippines - Usa ka bakol nga nagmentinar og drug den ang gidakop samtang nakaipsot ang igsuong babaye niini atol sa buy bust operation sa mga ahente sa Philippine Drug Enforcement Agency (PDEA)-7 sa miaging hapon diha sa barangay Duljo-Fatima siyudad sa Sugbu.
Si Jessie Tabanao, tigpamaba sa PDEA nga nahinabi sa Banat News miila sa nasikop nga bakol (polio) mao si Edwin Gutierrez, 36, samtang gipangita ang manghod niining babaye nga si Sheila.
Si Tabanao nagkanayon nga ang magsuong Gutierrez mao gyud ilang target sa buybust operation ug si Sheila maoy nakig-transaksyon sa ilang poseur buyer nga mipalit og shabu sa kantidad nga P3 mil.
Matud ni Tabanao nga human matunol ni Sheila ang shabu nakabantay kini nga awtoridad ang mipalit maong dali kining mibalik sa gate ug gi-padlock kini dayong dagan sa luyo ug milatay-latay sa atop sa balay sa ilang mga silingan ug nakaikyas.
Si Edwin nga naa sa sulod sa balay gisikop sa PDEA-7 dihang gisulod na sa mga ahente ug nakuha sa usa ka pouch sa shade ang 84 ka paketeng gituohang ang sulod shabu, samtang usa ka bultong gituohang shabu, unom ka relo, lima ka cellphone ug P400 nga cash sa lawak “suyopanan”.
“Kanang P400 pulos na siya tag P20 silbi abang na kun dunay magsuyop, unya kanang relo ug cellphone gibilin na sa mga kustomer kun walay kuwarta ilaha gihapong pasuyopon unya ipalukat na kun duna nay kuwarta,” matud pang Tabanao sa Banat News.
Si Edwin hugtanong mihimakak sa pasangil ug nagkanayon nga dili iyaha ang mga nakuhang shabu sa PDEA diha sa ilang panimay. - BANAT NEWS