Ginang nga natulog gitusak-tusak sa bana

CEBU, Philippines - Kritikal ang usa ka inahan human unaya pagtusaktusak sa iyang bana og kutsilyo kinsa misuway usab unta paghikog pasado alas-7 sa miaging gabii sa Villa Leyson barangay Bacayan ning dakbayan.

Ang asawa nailhan nga si Marie Christine Borja, 38, usa ka call center agent samtang ang suspetsado nga iyang bana nailhan sa ngalan nga si Ian Borja, 27.

Base sa alegasyon sa biktima ngadto sa kapolisan nga nakamata nalang siya gikan sa pagkatulog dihang nakabatyag siya og sakit sa lawas ug nakugang siya nga gitusak-tusak na siya og kutsilyo sa iyang bana.

Bisan paman og samaran misuway siya pagpanagang ug nagpakitabang sa mga silingan, ang ilang katabang nga si Lorna Mapili kinsa daling misusi sa kaguliyang sa lawak nakaakto sa pagtusak-tusak sa suspek sa biktima gamit ang screw driver ug kutsilyo.

Si Mapili daling mikaratil og dagan ug gikuha ang 4-anyos nga anak sa magtiayon ug daling mitawag og polis

Apan nasayran nga human gitusaktusak sa suspetsado ang biktima siya na usab ang mipasakit sa iyang kaugalingon pinaagi sa paglaslas unta sa iyang pulso ug pagduslak og kutsilyo sa iyang tiyan.

Ang kapolisan nga miresponde daling mipunit sa magtiayon nga nagtupad og higda nga pulos samaron ug gidala sa North General Hospital. Sa pakighinabi ni PO3 Edario Manatad sa Homicide Section mibutyag kini nga ang biktima nakaangkon og samad dinunggaban sa liog, kilid nga bahin sa iyang lawas, bukton ug ulo.

Nakuha sa kapolisan ang tulo ka kutsilyo diin ang usa niini adunay gitas-on nga kapin 12 pulgadas samtang ang duha aduna usab gitas-on nga walo ka pulgadas, lakip usab nga gigamit sa suspetsado mao ang screw driver nga adunay gitas-on nga kapin walo pulgadas.

Midugang si Manatad nga sa ilang pagsukit-sukit sa biktima ilang nasayran nga kapin sa tuig na nga nawagtangan og trabaho ang suspetsado nga maoy ilang gidudahan nga hinungdan.

Butyag usab ni Manatad nga base sa ilang nakuha nga impormasyon wala gyud mag-away ang duha sayo nianang adlawa. - BANAT NEWS