CEBU, Philippines - Aron mahunong na ang bangi tali sa mga mananagat ug sa mga miyembro sa Bantay Dagat sa mga lokal nga kagamhanan, ang oposisyon nga konsehal sa dakbayan sa Talisay miduso og resolusyon alang sa kasulbaran sa nahisgutang problema.
Si Konsehal Romeo Villarante miduso sa Resolusyon Numero 2022-03-2 sa ilang regular nga sesyon niadtong Martes nga naghangyo kang Mayor Socrates Fernandez nga mopahigayon og dayalogo o pulong-pulong tali sa kagamhanan sa lungsod sa Cordova ug dakbayan sa Sugbo kabahin sa tagsa-tagsa ka mga teritoryo sa kadagatan niini.
Si Villarante sa iyang resolusyon nagkanayon nga adunay mga reklamo ang mga mananagat sa Talisay tungod kay sikopon sila sa ubang mga otoridad sa Bantay Dagat sa ubang kalungsoran bisan kun sakop pa sa teritoryo sa Talisay ang ilang gipanagatan.
Matud sa konsehal nga ang maong sitwasyon nakahatag og dili maayong epekto sa panginabuhian sa mga lokal nga mananagat ug sa tagsa-tagsa nila ka mga pamilya.
Si Villarante mihangyo nga ang lokal nga kagamhanan mohatag og dinali-ang pagtagad sa pagsulbad sa maong problema aron maprotektahan ang lokal nga mga mananagat.
Apan ang nahisgutang resolusyon ni Villarante gi-refer ngadto sa Committee on Environment alang sa dugang mga pagtuon niini. Si Alfie Fernandez, usa sa mga residente sa daplin sa baybayon sa barangay Poblacion, Talisay ug miyembro sa Knight-Steward of the Sea, Inc. nga grupo sa environmentalist, nagkanayon nga sa milabay’ng mga katuigan ang kadagatan sa Talisay abunda kaayo sa isda apan tungod sa dynamite fishing mihutos na kini karon.
Gawas sa dinamita naa pay mga dagkong panagatan nga gikan sa ubang lugar nga mokawat-kawat og panagat sa kadagatan sa maong dakbayan busa labing nakasawot sa isda niini nga nakapa-apektar pag-ayo sa panginabuhi sa lokal nga mga mangingisda. (BANAT NEWS)