Batang naanod patay

CEBU, Philippines - Napalgan na nga patay kagahapon diha sa Pier 1 ang 8-anyos nga bata nga naanod sa sapa sa miaging adlaw diha sa Lower Purok 3 sa barangay Camputhaw.

Si Vrile Dave Amay,tinun-an sa Grade 2 sa Camputhaw Elementary School giingong nagduwa ug naligo sa sapa ug wala makabantay nga mikusog ang bul-og sa tubig gumikan sa uwan niadtong Martes sa udto.

Nakit-an pa unta kini sa mga estambay sa maong dapit samtang gianod ug nagpakitabang apan wala nila kini makuha gumikan sa kakusog sa baha.

Ang patay nga lawas nakit-an kagahapon sa mga sakop sa Special Operations Group sa Philippine Coast Guard nga nag-roving sa Pier 1 sa alas 7:30 sa buntag.

Ang bata matud pang PO3 Geoffrey Gutual sa Homicide Section sa Cebu City Police Office adunay daghang mga bun-og sa agtang ug kalawasan nga gituohang inagian sa pagkaigo niini sa mga gahi nga butang o dapit sa sapa diin kini maanod.

Nasayran nga namasahero og jeepney ang mga ginikanan sa biktima nga sila si Valentino Amay uban sa iyang kapikas nga si Maria Vanessa sa dihang nahitabo ang insidente.

Sumala pa sa desk clerk sa Barangay Camputhaw nga si Josephine Isrosido nga sa dihang nahitabo ang pagkaanod sa bata, dali dayon mitawag ang ilang kapitan nga si Lorenzo Basamot sa PCG busa dali dayon mihimo og operasyon ang maong ahensya.

Kahinumduman nga ang Camputhaw maoy usa sa apektadong dapit sa siyudad nga gibahaan. Naapektahan usab ang barangay Zapatera, Mabolo, Guadalupe, Parian, Mambaling ug uban pa.

Ang PCG ug rescue teams padayon pang nangita sa gi-report nga duha pa ka laing gianod nga mga tawo gikan sa dakbayan sa Mandaue.

Sa laing bahin, kanunay karon nga nakaalerto ang Cebu City Coordinating Council gumikan sa sunod-sunod nga pagbunok sa uwan.

Sumala pa ni Mayor Michael Rama, nga aduna nay command center sa iyang buhatan aron maoy mag-monitor sa siyudad panahon sa katalagman.

Si Alex Padin sa Philippine Atmospheric, Geophysical and Astronomical Services Administration (PAG-ASA)-Mactan, weather observer specialist mibutyag sa Banat News nga ang nahitabong kalit pagbundak sa ulan nga nasinati karong mga panahona mugna sa kusog nga hangin sa silangang bahin sa nasud.

Matud pa ni Padin nga mipagawas sila sa gale warning tanang dapit sa Kabisay-an ilabi na sa kabaybayunan samtang masinati gihapon ang mapanganurong kalangitan nga inubanan sa kusog nga uwan ug dugdog ug kilat.

Samtang gihulagway usab ni Padin nga delikado usab ang kadagatan tungod sa kusog sa hangin niini nga adunay gikusgong 55 ngadto 68 kilometro matag oras nga magdala og dagkong balod nga may gitas-on nga 3.7 ngadto sa 5.0 metros.

Mipahimangno usab si Padin sa mga nagpuyo sa daplin sa dagat o sapa nga mangandam aron makalikay sa posibleng disgrasya.

Samtang sa mga bukid nga bahin, mag-igmat usab ilabi na kadtong mga molupyo sa mga yuta nga humok kaayong madahili. - BANAT NEWS