Taga Medellin nabalaka sa tubig

CEBU, Philippines - Nabalaka ang mga molupyo sa lungsod sa Medellin nga makontaminado ang ilang tinubdan sa tubig nga imnunon sa lungsod tungod sa nagpadayong konstruksiyon sa 70 ektaryas nga golf course sa duha ka barangay sa Lamintak Sur ug Lamintak Norte.

Si Konsehal Conrado Mangubat, ang kasamtangang presidente sa Lamintak Water Works System (LARWASA) maoy mipaabot sa Bantay Radyo sa maong kabalaka tungod kay matandog man ang ilang tinubdan sa tubig sa padayong pagkubkob sa yuta alang sa maong golf course.

Gipasabot niya nga ang LARWASA nga nagbasi usab sa maong lugar maoy nag- supply og tubig nga imnunon sa mga molupyo sa tibuok lungsod.

Nunot niini ang acting vice mayor nga si Juan Alfonso Lim mipasalig atol sa interview sa Bantay Radyo nga mihimo dayon sila og aksiyon sa maong reklamo pinaagi sa pagpakuha og water sample sa maong lugar ug gipa-examine na nila sa University of San Carlos (USC) laboratory ug gipaabot nga mogawas ang resulta niini sulod ning semanaha.

Matud ni Lim nga paabuton nila ang resulta niini una sila mohimo og tukmang lakang pagtubag sa maong problema.

Gipasalig ni Lim nga himoon nila ang tanan sa pagsulbad niini kun masayran na nila ang resulta sa maong eksaminasyon sa water sample diin kun mamatud-ang delikado ang kahimtang sa ilang tubig nga imnunon, dihadiha moluwat sila og cease and desist order batok sa developer sa maong proyekto. - BANAT NEWS