2 gipamusil pulos angol

CEBU, Philippines - Pulos angol ang duha ka tawo human kini pamusila sa wala hiilhing mga kriminal sa managlahing lugar ning lalawigan sa miaging gabii.

Ang mga biktima mao sila si Antonio Madraga, 38, taga barangay Pondol, lungsod sa Balamban, usa ka trabahante sa Tsuneishi Shipping Company sa Balamban ug Renante Monterola, hingkod, nga taga barangay Mantuyong, dakbayan sa Mandaue. Si Liza Madaraga, asawa ni Antonio mibutyag sa kapolisan nga hapit na manira sa tindahan ang iyang bana dihang mikalit lang og hunong ang usa ka motorsiklo sa atubangan sa ilang tindahan.

Unya nanaog ang duha ka wala ilhing sakay niini ug mipalit og ilimnong makahubog , nanag-inom ug mitipon pa ang biktima sa maong inom kay giagda kini sa maong mga tawo

Apan pipila ka gutlo nananghid na ang biktima nga mangundang na sila og inom kay manira na siya. Apan gikasuko kini sa mga kriminal, dayong lanit sa ilang armas de fuego ug giluthang ang biktima kinsa nasabak sa dughan ug paa.

Human matumba sa sawog ang biktima, misirit dayon pahilayo ang mga kriminal.

Gidudahan sa mga otoridad nga gisuyaan lang ang biktima, apan gipangita pa nila karon ang mga kriminal aron kapahamtangan og silot.

Samtang si Monterola giingong natulog sa kilid sa ilang balay dihang kalit lamang gipusil sa wala hiilhing kriminal.

Ang duha ka mga biktima dali nga gipanghatod sa tambalanan, samtang padayon pang gipangita sa kapolisan ang mga miluthang kanila. - Reina Vita Labang ug Maria Ana Carmela Estenor (BANAT NEWS)