2 naghikog gumikan sa problema

CEBU, Philippines - Duha ka tawo ang nakabsan sa kinabuhi gumikan sa paghikog sa nagkalainlaing dapit sa lalawigan sa Sugbo kagahapon sa kaadlawon.

Sila mao si Cyrus Jaime, 28, taga barangay Casuntingan, dakbayan sa Mandaue ug usa ka call center agent, ug Leon Apor, 26, minyo, nga taga barangay Catibas, lungsod sa Balamban.

Si PO2 Benjie Abato sa kapolisan sa Presinto 4 sa barangay Casuntingan, dakbayan sa Mandaue mibutyag nga si Jaime napalgan sa iyang ginikanan nga patay na nga nagbitay sulod sa lawak niini kagahapon sa kaadlawon.

Matud pa ni PO2 Abato nga pisi nga nylon maoy gihikot ni Jaime sa iyang liog ug ang pikas tumoy niini gigaid sa sagbayan sa ilang balay .

Ang amahan ni Jaime nga si Evelio Jaime mibutyag usab sa kapolisan nga usa sa gituohan nilang hinungdan sa pagpakamatay sa iyang anak mao ang pagkatangtang niini sa iyang trabaho.

Kay matud pa niya nga sukad kini nawad-an og trabaho magpunay nalang og hinuktok sulod sa balay, wala nay suroysuroy kay gikaguol pag-ayo niini   ang pagkawagtang niya sa trabaho.

Unya sa bongbong sa lawak niini didto gisuwatsuwat sa makadaghan ang ngalan sa iyang hinigugma.

Samtang si Apor kinsa trabahante sa Tsuneishi Shipbuilding Company sa lungsod sa Balamban napalgan sa iyang asawa nga wala nay kinabuhi nga nagbitay sa sanga sa usa ka punoan sa kahoy sa gawas sa ilang balay didto sa barangay Cantibas, lungsod sa Balamban kagahapon gihapon sa kaadlawon.

Matud pa ni Florenda Apor, asawa sa naghikog, nga gihiktan gihapon og pisi ang liog niini ug ang pikas tumoy sa   maong pisi didto igaid sa dakong sanga sa kahoy .

Si SPO3 Arvie Banate ug PO2 Cesar Climaco sa Balamban Police Station mibutyag sa Banat News nga ang kawad-on maoy usa sa hinungdang gitumbok sa asawa ni Apor nga maoy hinungdan sa paghikog sa iyang bana.

Matud pa naguol kaayo si Apor tungod kay wala siyay kuwarta nga ikapaayo sa gubaon niyang balay.

Ang mga pamilya sa nanaghikog gitambagan sa kapolisan sa ilang tagsatagsa ka lugar nga ipaubos sa awtopsiya ang mga patay’ng lawas niini. - Uban sa report nila ni Monnahlie Olandria ug Kristel Cordero (BANAT NEWS)