Pasangil nga kagawon ang karne gihimakak

CEBU, Philippines - Giisip nga usa ka black propaganda ug pagdaut ang gihimo sa mga meat importer sa giingong puno sa kagaw ang mga local nga karne nga giladlad   sa merkado publiko sa dakbayan sa Mandaue.

Si Cesar Mercadal Jr., nga maoy officer in charge ug market administrator sa dakbayan sa Mandaue nagkanayon nga sa ilang bahin gihimo nila ang ilang kaakohan sa pagsiguro nga luwas ang mga karne nga gibaligya ngadto sa katawhan.

Gitataw niya nga ilang hingpit nga napakgang ang suliran sa hot meat nga gibaligya sa dakbayan pinaagi sa kanunay nilang operasyon nga nagsugod niadto pang bulan sa Septiyembre sa miaging tuig.

Dugang pa niya nga ang karne nga gibaligya sa merkado sa dakbayan nga gikan sa kaugalingong ihawan sa barangay Labogon gisiguro nilang luwas kini sa mga sakit ug luwas ang panglawas sa katawhan nga mokaon niini.

Si City Veterinarian Daisy Penetrante miingon nga ang tanang karne sa hayopan nga giihaw sa ihawan sa barangay Labogon gihimoan kanunay og pagpaniid sa meat inspector sa dili pa ibaligya sa merkado.

Matud pa ni Mercadal nga ang tinubdan sa maong taho nga mialigar nga kontaminado ang gibaligyang karne sa merkado sa dakbayan nga gipasiugdahan sa ginganlan og Mario Montes dili katuohan kay wala kini sa talaan sa mga akriditadong meat vendor sa Mandaue.

Samtang ang usa ka technologist nga mao kunoy mi-eksamin sa mga karneng kagawon nga gikan sa merkado sa Mandaue wala usab magpaila busa dili angayang tuohan, matud pa ni Mercadal. - BANAT NEWS