CEBU, Philippines - Nadunggaban patay sa ama-ama ang ulitawo niyang humabdos dihang iya kining giuwang samtang nakig-away sa iyang maguwang didto sa barangay Banhigan lungsod sa Badian sa miaging Domingo sa hapon.
Ang biktima mao si Melchor Indig, 24, ulitawo nga nagpuyo sa nahisgutang lugar, samtang ang suspek mao si Domingo Suerte, 48, kapuyo ni Emiliana Indig, ang inahan sa biktima.
Si PO3 Joel Caballero, imbistigador sa Badian Police dihang nahinabi sa Banat News mibutyag nga ang biktima ug ang magulang niini nga si Maximo, 38, nagka-away kay pulos hubog.
Ang suspek nga nakakita nga nag-away ang biktima ug ang maguwang niini, dali nga miduol aron unta sa pag-uwang apan kini na ang giharong sa biktima nga nagdala og plamingko.
Giilog sa suspek ang plamingko sa biktima apan giingong misukol gyud ang biktima hinungdan nga nadunggaban niini ang naulahi sa buko-buko nga hapit gyud molapos sa dughan nga maoy hinungdan sa kamatayon niini.
Ang suspek nabalhog na karon sa karsel samtang gihikay na ang kasong ipasaka batok kaniya. - BANAT NEWS