Mga kaswal wa pay suweldo

CEBU, Philippines - Hangtud karun pabiling nagbagulbol ang mga kaswal nga kawani sa Kapitolyo tungod kay hapit na matapos ang buwan sa Enero apan hangtud karon wala pa gyud sila makadawat sa ilang suholan niadtong petsa 15 ning buwana.

Pipila ka mga kaswal nga kawani nga nadestino sa buhatan sa board members ang mitug-an dihang nahinabi sa Banat News nga nagproblema gyud sila kay sukad kagahapon hapit nalang matapos ang bulan apan wala pa sila makadawat sa ilang suholan.

Gidugang sa maong kawani nga nagdumili lang pagpaila sa iyang pangalan dihang nahinabi sa Banat News nga nabalaka sila nga malangay pa gyud ang ilang suholan tungod kay wala pa pirmahi ni Gob. Gwendolyn Garcia ang ilang mga appointment.

Dugang niini nga gidudahan nila nga nagpanagana ang gobernador pagpirma sa ilang mga appointments ilabi na kun mosang-at og reklamo sa korte si Bise Gob. Gregorio Sanchez Jr., nga una nang mi-insister nga ubos sa balaod siya maoy adunay katungod pagpirma sa appointments sa mga kaswal nga kawani ubos sa buhatan sa mga board members tungod kay nasakop kini sa Legislative Department.

Hinuon gipadayag sa Human Resource Development kon HRD personnel sa Kapitolyo Nolly Vincent Valencia dihang nahinabi sa Banat News sa telepono nga gihimoan na og appointments ang maong mga kawani ug on-process na usab ang ilang payroll karung buwana.

Gidugang ni Valencia nga dili lang ang mga kaswal nga kawani ubos sa mga buhatan sa board members ang nalangay ang pag-release sa suholan karong buwana tungod kay tanang kaswal nga kawani usab nga nadestino sa ubang departamento lakip sa buhatan sa gobernador. - BANAT NEWS