CEBU, Philippines - Gitakdang i-renew sa kagamhanan sa siyudad sa Sugbo ang kontrata sa mga drama talent ug director sa Anti-Drug Campaign sa Cebu City for Substance Abuse Prevention (COSAP) ug lugwayan nila ang serbisyo sa maong grupo hangtud sa Hunyo 30 niining tuiga.
Si Mayor Michael Rama ang gitakda nga mopirma sa maong kontrata diin ang mga talent magdawat og binuwang allowance nga P7,000 ug ang writer/director usab sa COSAP magdawat og P11 mil .
Ang dakbayan migahin og P528 mil nga talent fee alang sa mga drama talent sa COSAP sulod sa unom ka bulan alang sa Barangay Anti-Drug Drama Presentation.
Ang mga tawo sa COSAP maoy mosuroy-suroy sa nagkadaiyang barangay aron mopahigayon og mga drama sa entablado ug mo-edukar usab sa publiko kalabot sa mga negatibong resulta sa mogamit sa ginadiling drugas.
Kasagaran imbitaron ang maong grupo sa barangay ilabi na kung magkaduol na ang fiesta sanglit wala man kini bayad.
Samtang sa laing bahin sa resolusyon ni konsehal Jose Daluz III, ang kagamhanan sa dakbayan sa Sugbo maoy moabaga sa galastuhan sa umaabot nga selebrasyon sa Valentine’s Day Party sa mga Senior Citizen karong Pebrero 14 niining tuiga.
Gigahinan kini sa kagamhanan og P100 mil ug adto kini ipahigayon sa JSU-PSU Mariner’s Court, sa Pier 1, sa ALU Compound sa barangay San Roque siyudad sa Sugbo. (BANAT NEWS)