Spiderman gikasohan na

CEBU, Philippines -  Ang giilang Spiderman nga si Jecy Mollena, 20 , nga lumad nga taga barangay Basak, lungsod sa Catmon kinsa mikatkat sa tower sa Marcelo Fernan bridge sa miaging semana gipasakaan og kasong alarm scandal ug illegal nga pagdala og hait nga hinagiban. Kini ang nasayran sa Banat News gikan kang SPO2 Jesus Gemenia sa Investigation Detection and Management Bureau (IDMB) sa Lapulapu City Police Office (LLCPO).

Matud pa niya nga si Mollena nakahatag og kahasol sa publiko sa iyang pagsaka sa tower sa taytayan ug nasakmitan usab nila og sundang nga 15 pulgada ang gitas-on dihang ilang nadakpan.

Dugang pa ni SPO2 Gemenia nga miduaw sa ilang buhatan ang iyaan ni Mollena nga gikan pa sa Cagayan dihang nasayran niini ang balita sa telebisyon sa nahitabo ni Mollena .

Si SPO2 Gemenia miingon nga tinuod ang gisulti ni Mollena nga atua sa Cagayan ang iyang inahan nga buot niining apason nga maoy hinungdan   nga misaka siya sa ibabaw sa taytayan.

Ang iyaan ni Mollena mibutyag sa kapolisan nga si Jecy adunay gamay nga kakulian sa pangisip sama usab sa inahan niini nga atua sa Cagayan. Giangkon usab sa iyaan ni Mollena nga may usa usab ka igsoon si Mollena nga nakasinati usab og kakulian sa pangisip ug bag-o pa lang nakagawas sa mental hospital.

Hinuon si SPO2 Gemenia mipadayag nga bisan pa man sa gitug-an sa iyaan nga adunay kakulian sa pangisip si Mollena, sa gihapon ila kining gipasakaan og kaso ngadto sa korte.

Si Mollena mikatkat sa tunga-tungang bahin sa Marcelo Fernan Bridge sa habig sa dakbayan sa Lapulapu sa miaging Miyerkules sa hapon ug alas 11:00 pasado na sa buntag sa miaging Biyernes nanaog. (BANAT NEWS)