Robredo motabang pagsulbad sa 93-1

CEBU, Philippines -  Gipasalig ni Kalihim Jesse M. Robredo sa Department of Interior and Local Government (DILG) nga tabangan niya pagpangita ang kagamhanan sa dakbayan sa Sugbo og financial institution nga moabag aron masulbad ang problema sa mga molupyo sa siyudad nga naapektohan sa Provincial Ordinance 93-1.

Mao kini gibutyag ni Mayor Michael Rama kinsa nagkanayon nga dili pa dugay nagkahinagbo sila si Robredo ug nahisgotan nila ang maong isyu. Si Rama wala hinuon mohatag og katibuk-ang detalye sa ilang giistoryahan ni Robredo apan matud pa niya nga nalipay kaayo siya sa gipakitang kaikag sa kalihim sa DILG aron mahilot ang maong suliran.

Sa sayo pa daan nang gisaad ni Rama nga dili nila lung-an uban sa taga Kapitolyo ang pagsabotsabot sa tukmang mga paagi hangtod nga masulbad sa hingpit ang maong isyu.

Kini ipinaagi sa gitukod nga Technical Working Group (TWG) sa siyudad nga gitahasan sa siyudad aron motuki sa kasulbaran ning maong isyu.

 Ang maong grupo sa TWG gilangkoban nila ni Konsehal Alvin Dizon, kanhi administrator Francisco Fernandez, Konsehal Sisinio Andales, City Administrator Jose Marie Poblete, Konsehal Edgardo Labella ug Konsehal Nida Cabrera.

Si Cabrera sa iyang bahin daan nang mipasalig nga paninguhaon sa ilang grupo nga masulbad ang maong isyu sulod sa unom ka buwan o hangtud sa dili pa mahuman ang ilang termino. (BANAT NEWS)