3 naangol sa SRP

CEBU, Philippines - Nangalagpot sa daplin sa karsada ang tulo ka tawo human ang ilang gisakyang motorsiklo nakasaghid og laing sakyanan nga gisundan kagahapon pasado alas-10 sa buntag diha sa South Road Property (SRP) taytayan sa Ludo dayon na sa bag-ong tunnel.

Si Manuel Tagaan sa records section sa Traffic division nga nahinabi sa Banat News miila sa mga biktima nga sila si Dario Mendoza, 36, taga Candaway Dumaguete City, naila siya subay sa iyang lisensya, ug maoy nagmaneho sa motorsiklo nga nagtangag lang sa plakang GN-3343. Ang backriders ni Mendoza mao sila si Clarita Molado, 20, ug Aiza Debalucos, 22, pulos taga barangay San Roque siyudad sa Talisay, ang duha nang-hitch-ride llamang.

Matud ni Tagaan ang mga biktima anaa karun gipatambalan sa Cebu City Medical Center (CCMC) apan sa pagkutlo ning balita wala pay mianha sa ilang buhatan aron magpakisusi sa maong hitabo.

Si Alex Singson, SRP security ug driver sa SRP Patrol Car nga nahinabi sa Banat News mitug-an nga iyang nasundan si Mendoza nga labihan gyud kusoga nga nagpadagan diha sa SRP apan pag-abot na sa may taytayan sa Ludo mi-overtake kini og sakyanan apan sa dihang milugar na unta siya sa daplin iyang nasaghiran ang laing motorsiklo.

Sila si Molado ug Debalucos nga walay mga helmet nakaangkon og samad sa kalawasan lakip na ang ulo niini. Ang mga sakop sa Emergency Rescue Unit Foundation (ERUF) daling miresponde sa nahitaboan ug gitabang ang mga biktima ug gidala sa nahisgutang tambalanan.   (BANAT NEWS)