Polis imbestigahon bahin sa mga gikawat dolyar

CEBU, Philippines - Si Sr. Supt Erson Digal, hepe sa kapolisan sa lalawigan mimando nga imbistigahon si SPO3 Castor Laurel sa Danao City Police.

Kini tungod sa pasangil sa magtiayong Neil Muñoz ug Marichu nga sa $6 mil nilang kuwarta nga gikawat sa miaging adlaw, $303 nalang ang nahibalik niini kanila ug mipasangil nga ang kapolisan sa Danao maoy nakahipos niini.

Matud pa ni Digal nga nakigtagbo kaniya sa iyang buhatan ang magtiayon ug mipahibawo nga mopasaka sila og kaso batok kang Laurel.

Nasayran nga ang miuli sa $303 ngadto sa magtiayon mao ang inahan sa usa ka menor de edad nga mikawat sa $6 mil nga kuwarta sa mga biktima human lungkaba ang ilang balay sa suspetsado.

Ang mga biktima nagtuo nga dili mahurot sa usa lang ka higayon ang maong kantidad nga $6 mil busa nagduda sila nga anaa ni Laurel ang ubang mga dolyar.

Gawas kang Laurel, ipaimbistigar usab ni Digal si SPO1 Florante Capampangan ang kauban ni Laurel.

Matud ni Digal nga dili siya gusto nga maghugawhugaw ang kapolisan sa ilang katungdanan tungod kay mao kini makapungot sa mga sibilyan ug mawad-an na hinuon og pagsalig ngadto sa mga otoridad sa kagamhanan. (BANAT NEWS)