CEBU, Philippines - Patay ang usa ka drayber sa habal-habal nga sakop usab sa Akhro human kini pusila sa usa ka wala hiilhing lalaki didto sa barangay Poblacion West, lungsod sa Moalboal sa miaging Sabado sa gabii. Ang biktima giila sa kapolisan nga si Roel Alquizalas, 23, taga barangay Tuble sa nahisgutang lungsod.
Sumala sa kapolisan nga ang mga criminal nagsakay og motorsiklo nga pulos nagtaptap og panapton sa nawong.
Base sa imbestigasyon sa kapolisan nga ang biktima mipalit og tubig sa Automatic Tubig Machine (ATM) nga nahimutang sa daplin sa karsada dihang kalit lang mihunong sa iyang tungod ang usa ka motorsiklo nga giluwanan sa duha ka wala hiilhing lalaki.
Unya ang backrider niini maoy nanaog ug walay tingog-tingog nga miluthang sa ulo sa biktima. Dihang nahagba na ang biktima sa karsada giusban pa kini og pusil sa dughan dayong kabayo og balik sa motorsiklo ug mipabulhot dayon pahilayo sa maong lugar.
Na-recover sa mga polis gikan sa lugar nga nahitaboan ang usa ka kabhang sa bala sa wala matino ang kalibre.
Gihatod dayon ngadto sa Barili District Hospital ang biktima diin kini ideklarar nga patay na sa pag-abot didto.
Si SPO2 Edgar Labe sa Moalboal Police Station nagkanayon nga base sa ilang nahipos nga report si Alquizalas usa ka sakop sa Akrho, ug mao usab kini tighatag og impormasyon sa kapolisan bahin sa illegal nga kalihokan sa drugas sa maong lungsod. - BANAT NEWS