Quarrying sa kabukiran higpitan

CEBU, Philippines - Giawhag ni Board Member Thadeo Ouano ang Mines and Geosciences Bureau sa Department of Environment and Natural Resources (DENR) 7 sa pagtabang sa kagamhanan sa lalawigan alang sa higpit nga pagpatuman sa pagdili sa paghakot og anapog, balas ug uban pa nga maoy makamugna og mga pagbaha ug pagdahili sa yuta.

Si Board Member Ouano nga maoy chairman sa committee on environment sa Hunta Probinsiyal sa iyang resolusyon iyang gipadayag nga ang higpit nga pagpatuman sa pagluwat og permit ug clearance alang sa paghakot og anapog sa kabukiran ang mahinungdanon kaayo alang sa paglikay sa mahitabong katalagman.

Gitataw ni Ouano nga ang Mines and Geosciences Management Bureau mipahigayon na og mga pakisusi sa mga lugar nga diin adunay operasyon sa pagpangubkob.

Kini aron pagsusi kun ang maong operasyon nakaapekto ba sa kalig-on sa yuta batok sa mga pagdahili ug pagbaha nga moresulta unya sa pagkakalas sa kinabuhi ug kadaot sa mga imprastraktura.

Matud pa ni Ouano nga nagkinahanglan kaayo ang higpit nga pagpatuman sa mga lagda sa quarrying dinhi sa lalawigan tungod sa mga nasinating mga katalagman sa nanglabay’ng mga adlaw.

Dili momenus 60 ka panimalay gikan sa lungsod sa Carcar ug lungsod sa Ronda niadtong milabay’ng semana tungod sa grabeng pagtaas sa tubig sa mga kasapaan sa ilang mga dapit. - BANAT NEWS