TCPS may suspek na sa 2 ka pagpamusil

CEBU, Philippines - Ang kapolisan sa dakbayan sa Talisay duna nay gisundang mga tawo nga suspetsado sa duha ka insidente sa pagpamusil nga nahitabo diha sa barangay Poblacion niadtong Miyerkules sa gabii ug diha sa barangay Tanke niadtong Huwebes sa buntag.

Si Supt. Henry Biñas, hepe sa Talisay City Police Station sa pakighinabi niini sa mga tigbalita kagahapon mibutyag nga duna na sila’y mga suspek nga gisundan kabahin sa nahisgutang pagpamusil apan nagdumili ang hepe sa pagbutyag sa mga pangalan niini.

Kahinumduman nga wala na makaabot nga buhi ngadto sa tambalanan ang usa ka menor de edad human kini pusila sa lalaking nag-angkas og motorsiklo niadtong Miyerkules sa gabii diha sa Noel Boulevard, Poblacion.

Sa maong insidente napagan sila si Rey Torcide Basmayor, 39 ug Anthony Salbado Delima, 24, apan pulos lang nangaangol.

Ang tulo kinsa mga residente diha sa barangay Poblacion parehong nagtan-aw sa mga nagduwa og baraha atol sa nahisgutang pagpamusil.

Matud ni Biñas nga wala nila isalikway karon ang anggulo kabahin sa personal nga bangi tungod kay pipila ka buwan ang milabay ang menor duna kini nabunalan og botelya sa beer apan ang nabunalan niini wala mopa-blotter diha sa buhatan sa kapolisan.

Gawas sa maong anggulo gitutokan usab sa mga polis ang bangi kabahin sa fraternity.

Gibutyag sa hepe nga giadto nila ang balay sa suspetsado sa maong pagpamusil apan wala na kini.

Sa maong hitabo diin usa ka menor de edad ang nalambigit giawhag ni Biñas nga higpitan ang pag-implementar sa curfew sa mga batan-on sa tibuok barangay sa Talisay.

Mabantayan karon nga ang mga kabarangayan miluag na usab sa ilahang implementasyon sa curfew hinungdan nga daghan na usab karong mga batan-on ang maglibudsuroy diha sa kadalanan sa siyudad bisan og lawom na kaayong gabii.

Sa laing bahin, ang kapolisan aduna na usab kini suspetsadong gisundan sa nahitabong pagpamusil ngadto sa sitio Kilawan, barangay Tanke niadtong Huwebes sa buntag kinsa si Jessie Maribao, 35, taga sitio Tunga nakaangkon og usa ka samad pinusilan sa likod nga bahin sa iyang ulo wala na makaabot nga buhi ngadto sa tambalanan.

Matud ni Biñas nga kalambigitan sa ginadiling drugas ang ilahang gitutokan nga anggulo sa maong pagpamusil tungod kay ang biktima sakop kini kaniadto sa usa ka drug personality nga ilahang nasikop sa ilang operasyon kaniadto diha sa barangay San Isidro.

Gibutyag usab sa hepe nga ang biktima misulti kini og ngalan sa usa ka tawo ngadto sa iyang kapuyo nga maoy ipapangita kung ugaling dunay dautan nga mahitabo ngadto kaniya.

Si Biñas midugang nga bisan og dili pa nila masikop ang mga suspetsado pasakaan gyud nila kini og kaso ngadto sa korte. - BANAT NEWS