Kompetisyon sa nindot nga karsada gilusad

CEBU, Philippines - Ang kagamhanan sa lalawigan sa Sugbo molusad karong Enero 25 sa kompetisyon sa labing nindot nga dalan sa kalungsoran ug sa mga component cities isip kabahin sa gipalapdan nga E-GWEN project.

Sumala pa ni Gobernador Gwendolyn Garcia nga ang matag local government unit kahatagan og premyo kun mapilian kining labing nindot nga highway.

Ang gobernadora nagkananayon nga ilakip usab sa kagamhanan sa lalawigan sa Sugbo ang paghatag og ganti sa mga kawani sa Engineering District sa Department of Public Works and Highways (DPWH).

Kini tungod kay sila ang nagmintenar, nag-atiman sa mga highway sa pagpatahom niini.

Magsilbing   mga hurado sa nahisgutang competition mao ang composite team sa kagamhanan sa lalawigan sa Sugbo nga gilangkuban sa Provincial Agriculturist Office, Ramon Aboitiz Foundation Incorporated kon RAFI ug Department of Tourism.

Gani aron gayud nga mapanindot ang kadalanan sa lalawigan ang matag Engineering District hatagan sa Kapitolyo og tag 20 ka mga grass cutter, 20 ka mga wheelbarrow o kartilya ug duha ka dump truck.

Gipasabot sa gobernador nga gilakip gayud niya ang mga pagpanindot sa kadalanan gumikan kay mao man kini ang maagian og mga sakyanan nga pasaheroan busa modayeg ang katawhan sa mga maayong mga proyekto sa probinsya.

Samtang ang awarding ceremony niini ipahigayon unya atol sa founding anniversary sa lalawigan sa buwan sa Agusto. (BANAT NEWS)