Laing polis gireklamong nanukmag

CEBU, Philippines - Usa ka polis kinsa nadestino sa Minglanilla Police Station ang gipasanginlang hubog ug nanukmag niadtong Biyernes sa mga alas 2:30 sa hapon diha sa usa ka convenience store nga nahimutang sa barangay Tabunok, dakbayan sa Talisay.

Ang giingong hubog ug nanukmag mao si SPO1 Florante Capangpangan taga, barangay Inuburan, dakbayan sa Naga ug nadestino diha sa Minglanilla Police Station.

Ang mireklamo ug nagpa-blotter sa kapolisan sa dakbayan sa Talisay mao si Roby Sayson, 29, taga barangay Tinaan, dakbayan usab sa Naga.

Base sa imbestigasyon sa kapolisan sa Talisay City Police Station nga si Sayson uban sa iyang uyoan nga mianha sa nahisgutang convenience store aron mag-grocery.

Apan samtang sila namili sa ilang paliton si Sayson mipasangil kang Capangpangan nga hubog ug kalit lang miduol ngadto kaniya ug mimando nga mopahatud.

Apan si Sayson nga nagdala sa iyang motorsiklo mibalibad sanglit dili man siya habalhabal driver ug wala usab niya gamita sa pamasahero ang iyang motorsiklo.

Tungod sa maong pagbalibad giingong nasuko si Capangpangan ug gisukmag siya niini diha sa tiyan hinungdan sa iyang kahadlok ug daling miadto sa TCPS.

Apan si Capangpangan kinsa nahinabi sa Banat News kagahapon sa telepono nahingangha niini ug mihimakak sa nahisgutang pasangil batok kaniya.

Matud ni SPO1 Capangpangan nga niadtong Biyernes diha lang siya sa ilang balay tungod kay off-duty siya ug kung mag-off duty siya dili siya maggawas-gawas o magsuroy-suroy. (BANAT NEWS)