3.3M nga turista sa DOT-7
CEBU, Philippines - Gipahibawo ni Department of Tourism-7 (DOT-7) regional director Rowena Monticello nga target nila karong tuiga nga makaagni og 3.3 milyones nga turista dinhi sa Sugbu.
Usa sa gihulagway ni Montecillo nga epektibong tourism program mao ang gimugna sa lalawigan sa Sugbo nga Suroy-Suroy sa Sugbu nga gipasiugdahan ni Gob. Gwendolyn Garcia.
Si Monticello nagkanayon nga gi-target nila ang mga langyaw’ng turista ug mga balikbayan nga moanhi sa Sugbo karong tuiga.
Gitug-an ni Monticello nga dako ilang kasegurohan nga mas motaas pa ang manganhing turista karong tuig 2011 tungod sa programa sa probinsya.
Sigon pa ni Monticello nga ang iyang gipamahayag gibase niya sa nagkadaghan nga mga turista nga miduyog sa bag-ohay pa lamang nahuman nga Suroy-suroy Sugbo Northern Escapade.
Atol sa maong kalihukan dul-an 300 ka mga Balikbayan ug mga langyaw nga mga turista ang misuroy sa 15 ka mga lungsod ug component cities sa amihanan nga bahin sa lalawigan. Gawas niini, ang mga nakasalmot na nga mga Balikbayan mitabang pa sa pag-promote sa tourism program ngadto sa mga asosasyon sa mga Filipino sa Estados Unidos. (BANAT NEWS)
- Latest
- Trending
