Mayor Ramirez mokiha sa mga miduot kaniya

CEBU, Philippines - Nagtinguhang mosumbalik pagpasaka og kaso ang kontrobersyal nga mayor sa lungsod sa Medillen nga si Ricky Ramirez batok kang Bimbim Abao, anak sa kanhi bodyguard ni Ramirez ug sakop sa Criminal Intelligence and Detection Group CIDG-7 nga si PO3 Arnold Bocayong. Gipadayag ni Ramirez atol sa interbyu sa Bantay Radyo nga nagkomboya sila si Bimbim Abao ug si PO3 Bocayong aron siya iduot ug pasanginlang maoy suspek sa kamatayon sa amahan ni Bombim nga si Edilberto Abao.

Matud ni Ramirez duna siyay daghang mga ebidensiya nga nahipos nga tumong ug tuyo sa pagpangusog karun ni Bimbim ug PO3 Bocayong nga nagduot kaniya sa maong krimen aron siya pangwartahan.

Gibulgar sab ni Ramirez ang iyang mga nahipos nga impormasiyon batok ni Bocayong nga gipasanginlan niyang nangilkil sa mga illegal nga sugal ug illegal nga panagatan sa ilang lungsod.

Dugang pa niya nga si Bocayong nangisyu og ID sa iyahang mga sakop sa Mayor’s Squad aron mahimong ‘asset’ ni Bocayong sa CIDG nga gipabayran og tag P150.

Gipasanginlan usab ni Ramirez diha sa maong interbyu ang maong polis nga nangilkil sa usa ka negosyante og isda sa barangay Mahawak pinaagi sa pagpangayo og protection money. Mipasangil usab kini sa lain pang polis nga si PO3 Boyet Yaon nga paryente sa napatay nga kapitan nga si Marianito Yaon nga gidudahang druglord tungod kay nasuko kini kaniya sa iyang pagtaktak sa igsuon niini nga nagtrabaho sa lungsod .

Matud pa ni Ramirez nga wala dayun siya motubag sa maong mga pasangil tungod kay nanghipos pa siya og mga ebidensiya batok sa mga nagduot kaniya. Sa iyang bahin, si Bocayong sa CIDG-7 dihang gikuhaan sa Banat News og pamahayag sa mga pasangil ni Ramirez, kini mihimakak nga nangisyu siya og ID sa CIDG diha sa Medellin.

Giklaro ni Bocayong nga ang maong ID giisyu sa panahon pa sa kanhi regional chief nga si Sr. Supt. Zoilo Lacheca niadtong 2008 apan dili siya maoy nagpirma sa mga I.D kundili mao si Chief Insp. Patrick Vaño.

Dugang pa niya nga ang P150 alang sa lamination apan wala sad gibayad diha kanila sanglit sila mismong gihatagan sa ID maoy mopa-laminate niini.

Gihimakak pud niya nga siya maoy miduol sa mga sakop sa Mayor’s Squad aron magpa-ID tungod kay ang mga sakop sa mayor maoy miduol kanila aron maisyuhan og ID aron madala nila ang ilang mga armas.

Gihimakak usab niya ang alegasyon ni Ramirez nga nangilkil siya sa mga sugalan ug panagatan sa maong lungsod.

Giklaro usab niyang walay ‘personalan’ ang ilang imbestigasyon ug dili siya maoy team leader sa mga imbestigador sa maong kaso apan nahibulong siya nganong gi-single out siya niini. (BANAT NEWS)