Langyaw gihulga sa uyab misumbong sa polis

CEBU, Philippines - Usa ka langyaw midangop sa kapolisan sa lungsod sa Consolacion kagahapon pasado alas 10:00 sa buntag sa kahadlok nga bugnoon sa kanhi niyang uyab.

Ang biktima giila nga si Paul Thomas Finlay, 64 , lumad nga taga New Zealand kinsa kasamtangang nagpuyo sa Del Monte, Talacogon, Agusan del Sur.

Ang kanhi uyab sa biktima nga si Belinda Recamadas, 31 ug lumad nga taga Agusan del Sur, giingon nga nakapatukod og balay sa Barangay Casili, lungsod sa Consolacion kinsa iyang nakaila niadtong Pebrero sa miaging tuig   pinaagi sa Internet.

Matud pa ni Finlay nga dili lang pagpanghulga kung dili nakuha usab ni Recamadas gikan kaniya ang kantidad nga mokabat sa P150,000 sulod sa halos usa ka tuig nga sustento niya sa mga panginahanglan ug kaluho sa maong suspetsado.

Nagdumili usab si Recamadas sa pag-uli sa Iremit Bankcard sa biktima hinungdan nga midesider kini sa pagtaho ngadto sa kapolisan.

Dugang pa ni Finlay nga nasuko si Recamadas sa dihang nasakpan niya kini nga adunay laing kalambigit nga kanhi polis usa ka drug dealer.

 Misuway si Finlay sa pakig-istorya sa suspetsado inubanan sa amahan niini apan gibaharan ni Recamadas ang ilang kinabuhi. (BANAT NEWS)