Duha patay sa aksidente sa Dalaguete, Dumanjug

CEBU, Philippines - Duha ang patay ug usa ang naangol sa nahitabong aksidente sa kadalanan sa managlahing lugar sa probinsya sa Sugbu kagahapon ug sa miaging adlaw.

Si Marites Amamangpang, 30, nagpuyo sa barangay Manangal lungsod sa Dalaguete namatay sulod sa Alfonso Alcantara Memorial Hospital sa Dalaguete human kini makaangkon og samad ug bun-og sa kalawasan human malagpot sa gisakyan nga motorsiklo.

Sa pasiunang pakisusi nga gihimo ni PO2 Reynaldo Amarillento sa Dalaguete Police Station nagbutyag kagahapon pasado alas-6 sa buntag ang biktima sakay sa motorsiko nga gimaneho ni Glicerio Arantar, 62, taga barangay Sacsac lungsod sa Dalaguete.

Samtang nagdagan sa national highway gikan sa habagatan ug paingon sa dakbayan sa Sugbu kalit silang naigo sa Mitsubishi van nagtangag sa plaka UTA-785 nga gimaneho ni Ranulfo Mayormita Jr., taga Punta Rizal St., sa dakbayan sa Lapulapu.

Dugang imbestigasyon ni PO2 Amarillento nga mi-overtake sa laing sakyanan si Mayormita apan nawad-an kini og kontrol sa manobela ug iyang naigo ang motorsiklo sa mga biktima.

Samtang ang laing aksidente nahitabo diha sa barangay Cogon lungsod sa Dumanjug diin usa ka Flaviano Balat-ag Camilo, 41, taga Kabalaasnan sa maong lungsod ang patay nang naabot sa Barili District Hospital human nakaangkon og grabeng bun-og sa kalawasan ug ulo niini.

Si Camilo nagmaneho og motorsiklo paingon sa Kabalaasnan apan pag-abot sa nahisgutang lugar kalit nadasmag sa usa ka motorsiklo nga giparking daplin sa dalan hinungdan sa iyang pagkalimbuwad. - BANAT NEWS