Batan-on gi-salvage

CEBU, Philippines - Napalgang patay ang usa ka batan-ong lalaki sulod sa usa ka basurahan sa miaging gabii sa sitio Atis sa Purok Mangga sa barangay Canjulao sa dakbayan sa Lapulapu.

Ang biktima giila nga si Nelson Codia alyas “Kagid,” 20, lumad nga taga Kawit, Medellin, ug kasamtangang nagpuyo sa sitio Matumbo sa barangay Pusok, dakbayan sa Lapulapu.

Si SPO2 Rolito Jumao-as sa Homicide Section sa kapolisan sa maong dakbayan miingon nga nadiskubrehan ang patay’ng lawas sa biktima sa mga barangay tanod ug molupyo sa maong dapit alas-5 pasado sa buntag kagahapon.

Matud pa ni Jumao-as nga ang mga barangay tanod sa maong dapit nakabati og sunod-sunod nga buto sa armas alas-12 pasado ang takna sa miaging tungang gabii sa dapit sa crime scene diin napalgan ang patay’ng lawas sa biktima.

Si Jumao-as miingon nga mga buto lang sa armas ang nabati sa mga molupyo ug walay nakakita sa mga responsable sa krimen sanglit layo man kini sa kabalayan.

Ang biktima adunay duha ka samad pinusilan sa ubol-ubol ug usa sa tampihak nga gituohang maoy hinungdan sa kamatayon niini, napalgan usab sa crime scene ang upat ka kabhang sa bala sa kalibre 45, tin foil ug plastic nga gituohang gisudlan og shabu.

Nagduda karon ang kapolisan nga posibleng may kalambigitan sa ilegal nga drugas ang motibo sa maong krimen. 

Gisubay na sa kapolisan ang giingong text message sa biktima ngadto sa iyang kabanay nga diin nagbutang sa mga pangalan sa mga tawong mi-hunting kaniya.

Giingong aduna kini utang sa maong mga tawo sa iyang text tungod sa ilegal nga drugas. - BANAT NEWS