CEBU, Philippines - Nagtingkagol sa Talisay City detention cell ang usa ka 21-anyos nga lalaki kinsa giingong naaktohan nga nagbit-bit og pusil sa mga polis ug tanod nga nag-roving sa barangay Bulacao, dakbayan sa Talisay kagahapon sa buntag.
Ang suspetsado mao si Keir Stephen Hermosilla, residente sa nahisgutang lugar.
Nasakmit sa mga polis ug tanod gikan kang Hermosilla ang usa ka kalibre .38 nga revolver nga adunay sulod nga upat ka buhing bala.
Ang maong lugar nabaniog kaayo nga kusog ang tulis ug kawat sa kable sa Philippine Long Distance Telephone (PLDT) hinungdan nga ang mga otoridad nag-roving kanunay sa maong dapit.
Nakita sa grupo si Hermosilla nga nagbarog sa basketball court nga nagbitbit og armas de fuego.
Ang suspetsado daling miitsa sa iyang pusil ngadto sa yuta ug misuway kini og dagan dihang nabantayan niini nga miduol ngadto kaniya ang mga polis apan dali usab siya nagunitan sa mga polis ug gidala ngadto sa police station.
Kasong paglapas sa Akta Republika 8294 nga mao ang balaod bahin sa illegal nga pagkupot og armas de fuego ang ipasaka batok sa suspetsado. - BANAT NEWS