2 miambak, angol

CEBU, Philippines - Suwerteng nabuhi pa ang duha ka mga tawong misuway og hikog pinaagi sa pag-ambak sa flyover ug sa First Mactan Bridge kagahapon apan ang duha pulos talandugon ang kahimtang samtang usa ka lalaki ang boluntaryong mikanaog gikan sa ibabaw nga bahin sa Marcelo Fernan Bridge human sa negosasyon.

Sayo sa buntag kagahapon, usa ka Romeo Golosino, 53, nagpuyo sa Urgelio St., sa barangay Sambag Uno, siyudad sa Sugbu ug usa ka newsboy ang gituohang nangagupok ang kabukogan sa tiil ug napantok ang ulo human molayat sa flyover sa dalan Osmeña Blvd. atbang sa Social Security System (SSS) pasado alas-9 kagahapon sa buntag. Usa ka tawo nga nagpaila lang sa apelyedo nga ‘Abella’ kinsa nakakita sa pag-ambak ni Golosino nagkanayon nga iyang nakit-an ang naulahi nga misaka sa flyover gikan sa pikas nga bahin ug pag-abot sa tunga-tunga mikatkat kini sa railings ug mipahiluna nga nagbarog samtang nagtan-aw sa mga sakyanan nga nangagi sa ubos.

Apan sa paghunong sa mga sakyanan kalit miambak si Golosino sa ubos ug mitugpa kilid sa center island.

Si Edgar nga usa usab ka newsboy ug igsuon ni Romeo mitug-an sa mga tigbalita nga dunay problema ang iyang igsuon sa ilang balay apan wala na kini motug-an bahin niini.

Sa gihimong pakisusi sa mga sakop sa Homicide Section pinangulohan ni PO3 Victor Ruel Ayuman, PO3 Geoffrey Gutual, PO2 Julius Mabunay ug PO1 Cristobal Geronimo nakahipos sila og dugang kasayuran nga si Romeo giingong mibahad na sa miaging mga adlaw nga maghikog gumikan kay giingong wala kini maka-remit ngadto sa dealer sa gikuhaan niini og newspaper nga iyahang gipamaligya.

Si Romeo kasamtangan karung giatiman sa mga doktor sa Cebu City Medical Center (CCMC). Sa laing insidente sa pagsuway og hikog, usa ka wala mailhing babaye ang miambak sa 1st Mactan Bridge pasado alas-2 sa hapon kagahapon sa barangay Looc syudad sa Mandaue.

Ang maong gibana-banang nagpangidaron og kapin 30-anyos, nagsul-ob kini og gray shirt ug pants, samtang ang gitas-on usab gibana-bana nga 5’3 ngadto sa 5’4 ang height ug pution ang pamanit ug sumala pa sa report sa Balitang Bisdak usa ka waitress sa usa ka kan-anan sa barangay Lahug.

Sa pakighinabi sa Banat News ni SPO2 Danilo Barreta, desk officer sa Mandaue Police Station base sa nakuhang impormasyon ni PO2 Bruce Taneo usa ka mananagat ang nakakaplag sa babaye diha sa Mactan Channel ilawom sa 1st Mactan Bridge.

Si Barreta miingon nga walay nakamatikod sa maong babaye dihang mikatkat kini sa railings ug miambak kini sa mokabat 200 metros nga gihabugon ug nahapla pagtugpa sa dagat. Apan dunay report nga sayo pa niana nakit-an kining nagpunay og hilak.

Ang maong babaye gidala sa mga mananagat sa daplin ug ang mga sakop sa Accident Control and Emergency Rescue Team (ACERT) maoy midala kaniya sa Mandaue District Hospital nga delikado pa ang kahimtang.

Pasado alas-4 kagahapon, laing lalaki ang mikatkat sa Marcelo Fernan Bridge sa habig sa barangay Pusok sa dakbayan sa Lapulapu nga nagdala og sako ug sundang.

Si PO1 John Philip Selmaro sa Lapulapu City Police Office miingon nga kadudahan kaayo ang intensyon sa maong wala pa mailhing lalaki apan duna silay pagdudang ‘kawatan’ kini.

Human ang ilang CCTV camera operator mibutyag nga nasigpatan na kining maong lalaki sa milabay’ng adlaw diha sa maong taytayan ug pipila ka minutos ang milabay napawong ang ilang CCTV.

Kagahapon, subling nasigpatan ang lalaki nga mikatkat sa ibabaw maong mitawag og kapolisan ang operator apan pag-abot sa mga polis daw mi-arte kining maghikog ug misuway pa og tigbas sa mga sakop sa Special Weapons and Tactics.

Si Sr.Supt. Anthony Obenza, director sa Lapulapu City Police Office sa pakighinabi sa Banat News kagahapon nagkanayon nga kung dili mokanaog ang maong lalaki ilaha kining sakaon.

Matud pa niya nga nagduda siyang ang sulod sa sako niini mga kinawat nga gamit gikan sa maong taytayan. Atol ning pagsulat ning balita alas-7:30 kagabii padayon pa ang negosasyon. Si Gumercindo Cabal, usa ka kanhi counselor sa usa ka drug rehabilitation center sa barangay Lahug nga nagbase na karon sa Manila sa pakighinabi sa Banat News miingon nga sagad sa mga maghikog adunay dakong problema ug ang pagka-adik sa illegal nga drugas.

“Suicidal tendencies. Kini ang mga tawong dunay depression pero walay kadaganan.Kanang mga higher cases, they think that to end their emotional sufferings is to end their lives by committing suicide,” matud pang Cabal kinsa midugang nga bugtong solusyon niini mao ang komunikasyon sulod sa pamilya.

Samtang dugang pa niini dinhi sa Pilipinas, ang mga hinungdan sa mga kaso sa paghikog mao ang kakabus, utang, drug addiction nga moresulta sa hallucination dayon ang nervous breakdown. - Rey Pasaporte ug report nila ni Lesley Caminade, Romeo Limpangog ug Edwin Ian Melecio (BANAT NEWS)