Taxi driver gikulata

CEBU, Philippines - Usa ka taxi driver ang midangop sa kapolisan kay mireklamong gikulata siya sa usa ka estambay didto sa dalan T. Padilla , sa barangay Tejero, dakbayan sa Sugbo sa miaging gabii.

Ang biktima mao si Benjie Monarca, 30, taga barangay Pusok dakbayan sa Lapu-Lapu, usa ka taxi driver sa Airland taxi, samtang ang nasikop nga suspetsado mao si Gemer Abrica, 27, taga barangay Lahug ning siyudad.

Ang biktima nga misugilon sa Waterfront Police Station 3 nagkanayon nga samtang nagmaneho siya sa iyang taxi, nanghasi ang maong suspetsado ug dihang mikanaog siya sa taxi, gikulata siya niini hinungdan nga nangayo siya og panabang sa kapolisan.

Ang biktima nga nahiagom sa mga bun-og sa lawas didto modangop sa nahisgutang Police Station 3.

Si PO3 Bolambao ug PO3 Aparri sa Waterfront Police Station diha-diha maoy misikop sa suspetsado.

Gihatod dayon ngadto sa tambalanan ang biktima, samtang ang suspetsado natanggong na karon sa Station 3 detention cell. - Reina Vita S. Labang ug Maria Ana Carmela Estenor (BANAT NEWS)