Mga turista mihugpa sa Consolacion

CEBU, Philippines - Gihugpaan sa mokabat sa 300 ka mga turista ug mga balikbayan ang lungsod sa Consolacion sayo sa buntag kagahapon sa ilang pagkuyog sa tulo ka adlaw nga Suroy-Suroy Sugbo 2011.

Si Mayor Teresa Alegado ug mga opisyal sa maong lungsod maoy misugat sa pag-abi-abi sa maong mga turista ug balikbayan nga gikuyogan usab ni Gobernador Gwendolyn Garcia.

Matud pa ni Alegado nga ilang gihangop nga nalakip ang ilang lungsod sa gipahigayong Suroy-Suroy nga gipasiugdahan sa kagamhanan sa lalawigan.

Kini tungod kay gihatagan sa Kapitolyo og pasigarbo ang ilang lungsod ilabi na karong misugwak na ang mga negosyante nga mibubo og puhonan sa maong lugar .

Si Board Member Agnes Magpale nga nahinabi sa mga tigbalita miingon nga mokabat sa 300 ang mga langyaw ug balikbayan nga mikuyog sa Suroy-Suroy paingon sa amihanang kalungsoran sa lalawigan.

Ang ilang biyahe paingon ngadto sa mga lungsod sa Bantayan, Madridejos ug Sta. Fe sa isla sa Bantayan.

Gitataw ni Magpale nga 80 porsiyento sa mga turista, mga langyaw gikan sa Canada, Los Angeles Nevada ug uban pa. Si Magpale miingon nga lakip sa mga lungsod nga duawon sa Suroy-Suroy Sugbo 2011 mao ang Liloan, Compostela, dakbayan sa Danao, Carmen, Sogod, Tabogon, dakbayan sa Bogo, Catmon ug Medellin.  - BANAT NEWS