CEBU, Philippines - Dili mominos napulo ka mga panimalay daplin sapa ang nangaguba ug gibanlas sa milapaw nga tubig bunga sa kusog nga uwan diha sa barangay Sta. Cruz sa lungsod sa Ronda alas 8:00 sa buntag niadtong adlaw’ng Lunes.
Matud pa ni PO3 Emirito Sansan sa Ronda Police Station dihang nahinabi sa Banat News nga kusog ang uwan ug hangin nianang milabay’ng gabii hinungdan sa paglapaw sa tubig sa sapa ug milimbuwad sa mga punoan sa kahoy ug kasagingan nga nababag sa kalsada.
Ang mga pamilya sa mga panimalay nga nangaguba temporaryong mipasilong sa ilang mga silingan ilabi na nga ang mga tampi sa sapa hinayhinay nang nahumok ug gibanlas sa tubig. Ang Philippine Atmospheric Geophysical and Astronomical Service Administration sa Mactan mibutyag nga walay nasigpatang bagyo nga nakaingon sa pag-ulan karon kundili epekto lang kini sa cold front.
Nunot niini gibutyag ni Konsehal Eugenio Layaguin sa Ronda atol sa interbyu sa Dydd nga gawas sa maong barangay ilaha usab karong gisusi ang bukirang bahin sa barangay Bibe nga nakasinati usab og landslide epekto gihapon sa nasinati nga uwan uwan. Gani sa nahipos nilang impormasyon nangliki na ang yuta nga nahimutang sa tunghaan sa sekondarya sa barangay Bebi tungod sa pagpunay og lihuk sa yuta sa maong lugar.
Giplanohan sa local nga kagamhanan sa Ronda nga i-relocate ang mga apektadong pamilya nga peligro sa baha ug landslide. Gibana-banang moabot P200mil ang danyos sa maong hitabo.
Niadtong milabay’ng adlaw 50 ka panimalay ang gilunopan sa barangay Poblacion 2 ug 3 sa Carcar ug usa ka batan-on ang na-missing tungod gihapon sa padayong pagbunok sa uwan ug pagbaha. - BANAT NEWS