Gitigbas og pinuti ulo napahak

CEBU, Philippines - Napahak ang ulo sa usa ka 33 anyos nga lalaki human kini tigbasa og pinuti sa iyang silingan didto sa barangay Lamisa, lungsod sa Balamban niadtong Lunes sa alas 7:00 sa gabii.

Ang biktima mao si William Diamante, 33, minyo, ug molupyo sa nahisgutang lugar, samtang ang suspek mao si Ronald Germoso, hingkod nga iya ra usab nga silingan.

Matud ni PO2 Cesar Climaco sa Balamban Police Station sa pakighinabi sa Banat News  nga ang biktima naglakaw sa dalan paingon na untang mopauli sa ilang balay dihang sa pag-abot niini sa ngitngit nga bahin duol sa ilang balay gidasmagan dayon sa suspek ug giligid og tigbas sa iyang pinuti.

Ang biktima nga nakalitan ug wala usab magpraktis og self defense maayong pagkaigo sa nawong ug gisundan sa iyang ulo hinungdan nga maayong pagka-pahak niini.

Dihang nahagba na sa yuta ang biktima uban sa pagbaha sa dugo niini daling misibat ang suspek.

Ang biktima gihatod dayon ngadto sa Balamban District Hospital apan tungod sa katalandugon   sa kahimtang niini, gi-transfer dayun sa tambalanan sa dakbayan sa Sugbo.

Ang kapolisan padayon pang nag-imbistigar sa maong kaso ug gipangita pa usab ang suspetsado. (BANAT NEWS)