Miambak sa irigasyon gianod sa baha missing

CEBU, Philippines - Pabiling missing ang usa ka 20-anyos nga ulitawo human kini giingong mi-ambak gikan sa irigasyon ngadto sa kusog nga bul-og sa baha tungod sa way hunong nga uwan sa barangay Poblacion lungsod sa Carcar alas 9:15 kagahapon sa buntag.

Ang pabiling missing nailhan sa kapulisan nga si Jerwin Canada, 20, molupyo sa sitio Caipilan barangay Poblacion-1.

Matud ni SPO1 Meliton Agadier sa Carcar Police dihang nahinabi sa Banat News, ang amahan sa biktima nga si Cesar Canada, maoy midangop sa ilang buhatan og nagpahibawo sa nahitabo sa anak niini.

Subay sa imbestigasyon, ang biktima giingong nag-ambo diha sa irigasyon nga nagtan-aw sa mikusog nga bul-og sa tubig tungod sa baha gikan sa bukid dala sa pagpunay og bunok sa ulan.

Apan nakurat nalang ang mga nakakita dihang kalit kining mipatong sa irigasyon dayong ambak sa ubos. Sumala pa sa mga estambay nga gikahinabi sa mga polis nga daw mi-dive kini paubos apan wala na motunga pa.

Gituohang gianod kini sa kusog nga bul-og sa tubig paingon sa dagat nga distansiya og kapin usa ka kilometro ang gilay-on gikan sa taytayan. Sukad kagahapon sa alas 3:00 sa hapon padayun pa ang search and rescue operation sa kapulisan ug dunay ubang mga tawong didto sa baybayon sa dagat nangita.

Matud ni Agadier kusog kaayo ang ulan sukad pa niadtong milabay’ng gabii hangtud na pagkasayo sa buntag hinungdan nga kusog kaayu ang bul-og sa tubig gikan sa bukid. (BANAT NEWS)