CEBU, Philippines - Tinguhang moduso og impeachment complaint si Compostela mayor-elect Joel Quinio batuk ni Comelec 2nd division Commissioner Nicodemo Ferrer ug mga kaubanan tungod sa gipakanaog nga desisyon niini nga nag-anular sa iyang proklamasiyon pagkamayor sa maong lungsod dungan sa pagmandong ipahigayun ang recount sa resulta sa milabay’ng eleksyon sa maong lungsod.
Matud ni Quinio nga dili siya maglisod sa pagpasaka og impeachment complaint batok ni commissioner Ferrer tungod kay matod niya suportado man siya ni Kongresista Red Durano IV.
Dugang pa ni Quinio wa gyuy basihanan ang desisyon sa Comelec pag-anular sa iyang proklamasiyon tungod kay walay iregularidad nga nahitabo niadtong milabay’ng eleksiyon sa Mayo sa miaging tuig.
Gani nabalaka si Quinio sa mamahimong mabali unya ang resulta kun mahinayon ang pagpahigayun og recount tungod kay wala sila mag-monitor sa mga election results nga atua karun sa kustodiya sa municipal treasurers office nga gihulagway sa kampo ni Quinio nga kaalyado sa iyang kaatbang nga si kanhi mayor Ritchie Wagas.
Tungod niini gipa-asikaso dayun ni Quinio sa iyang mga abogado ang pagduso og motion for reconsideration batok sa gipakanaug nga desisyon sa Comelec 2nd Division.
Lakip sa gi-anular ang proklamasyon mao ang iyang bise mayor nga si Antoniette Danggoy ug walo ka mga konsehal. Dugang ni Quinio nga makahatag lang og bati nga impresyon ang gipakanaug nga desisyon tungod kay nagpakita kini nga dunay depekto ang pagpahigayon sa labing una nga poll automation niadtong Mayo sa miaging tuig. Samtang si kanhi mayor Ritchie Wagas sa iyang bahin mipadayag atol sa interbyu sa usa ka sibyaanan nga gihangop niya ang maong desisyon ug gihulagway niya nga nagpakita lang kini nga dunay mapaabot nga hustisya ubos ning administrasyon ni Presidente Benigno “Noynoy” Aquino III.
Gipasalig hinuon ni Wagas nga iyang respetuhon ang bisan unsa nga mogawas nga desisyon sa recount unya nga gimando sa Comelec ug nanghinaut siya nga ingon usab niini ang buhaton sa iyang mga kaatbang. (BANAT NEWS)