CEBU, Philippines - Pormal na nga gipasidunggan kagahapon ang mga mananaug sa bag-ohay pa lang natapos nga Sinulog Grand Parade didto sa Cebu City Sports Center.
Ang mga nakadawat sa ganti mao ang Tribu Sinanduloy sa Tangub City sa unang puwesto alang sa Free Interpretation (FI) category.
Tribu Buyoganon sa Albuyog, Leyte , maoy ikaduha samtang naangkon sa Mabolo Elementary School ang ikatulong ganti.
Ang ika-upat nga ganti naangkon sa Tribu Kandaya sa Daanbantayan samtang ang Talamban ElementarySchool maoy ikalima.
Samtang sa Sinulog-based category, ang Tribu Sinanduloy sa Tangub City maoy nakaangkon sa unang puwesto.
Ang Abellana National School maoy ikaduha, ug ang ikatulo nakuha sa Dakbayan sa Carcar, ika-upat nahiadto usab sa Bayawan City samtang ang Cebu City Central School maoy nakasakmit sa ikalimang puwesto.
Sa duha ka kategorya, napili nga best in musicality ang Tribu Sinanduloy sa Tangub City ug Tribu Himug-Ulaw sa Placer Masbate.
Natuboy usab nga Best in Costume ang Dakbayan sa Carcar ug Tribu Buyoganon sa Abuyog, Leyte
Mikabat sa 143 ang misalmot sa Sinulog 2011 sa nagkadaiyang kategorya nga gilangkoban sa mga higante, float, Sinulog-based , Free Interpretation ug puppeteers.
Samtang gihulagway ni Mayor Michael Rama nga malampuson ang Sinulog 2011 gumikan kay nakita gyud niya sa mga tawo nga wala gyud matandog bisan pa man sa kusog kaayong uwan niadtong Domingo. (BANAT NEWS)