326 tonelada basura ang nahipos human sa Sinulog
CEBU, Philippines -Miabot sa 326 ka tonelada kun 326,000 ka kilong basura ang nagpasada ug nahipos sa dakbayan human sa pagpahigayon sa Sinulog Grand Parade niadtong Domingo.
Hinuon dali kining nahipos sa mga sakop sa Department of Public Services (DPS), Squatters Prevention, Encroachment and Elimination Division (SPEED), Department of Engineering and Public Works (DEPW), ug Cebu City Traffic Operation and Management(CITOM).
Ang pagpanghipos gisugdan dayon human gyud sa parade ilabi na diha sa carousel route ug mga tupad nga kadalanan. Niadtong milabay’ng tuig mikabat sa kapin 200 ka tonelada ang nahipos apan mas daghan karon.
Si Mayor Michael Rama nalipay sa gihimo sa maong mga departamento ug misaad og tagsa ka sako nga bugas ug t-shirts sa matag usa nga nakatampo sa pagpanghipos sa basura.
“Grabe kaayo ang involvement niining mga grupoha, they have exerted extra effort , they have been doing good and giving us pride,” matud pa ni Rama.
Natagbaw ang mayor sa gipakitang kakugi sa mga street cleaners tungod sa pagtuman sa ilang tahas nga dili maugmaan ang mga basura nga nagtipon-og sa kadalanan busa angayan lang nga tagaan kini og pahalipay..
“Dili lalim ang ilang trabaho, ikaw kuno’y magpupho og hugaw ug magbuwad sa init,” dugang pa sa mayor. (BANAT NEWS)
- Latest
- Trending
