CEBU, Philippines - Naputos sa samad pinusilan ang lawas sa usa ka lalaki nga maoy namatyan niini human kini paulani og bala sa wala hiilhing lalaki nga nagsakay og motorsiklo didto sa sitio Huyong-huyong, barangay Alaska –Mambaling ning dakbayan sa Sugbo sa miaging gabii.
Ang biktima nailhan nga si Samson Sumilhig Bato Balunos, 30, nga taga Alaska Sa pasiunang imbistigasyon sa kapolisan nasayran nga ang biktima kauban sa iyang silingan nga si Arthur Alerado, nga nanan-aw og salida sa telebisyon sa daplin sa karsada sa wala pa mahitabo ang pagpamusil.
Unya kalit lang mihunong ang usa ka motorsiklo nga giluwanan sa upat ka tawo nga pulos nanag-bonet.
Ang biktima kinsa murag nakaalinggat nga siya maoy tuyo niini mikabad og dagan aron unta makaikyas sa kamatayon, apan giingong gigukod kini sa mga kriminal.
Dihang naapsan ang biktima, mikanaog ang usa sa angkas sa motorsiklo og gipaulanan sa mga bala ang naulahi hangtod nga nalup-og kini sa karsada.
Ang biktima nakaangkon og mga samad pinusilan sa nagkadaiyang bahin sa iyang lawas nga maoy hinungdan sa iyang hinanaling kamatayon.
Gisuta pa sa kapolisan ang hinungdan sa maong pagpamusil samtang naniid usab sa mga kriminal. (BANAT NEWS)