Driver gipusil patay

CEBU, Philippines - Patay ang usa ka drayber sa habal-habal human kini pusila sa wala hiilhing kriminal sa iyang paggawas sa ilang balay didto sa barangay Cabangahan, dakbayan sa Danao sa miaging gabii.

Ang biktima mao si James Batocan Canoy, 35, minyo ug drayber sa   habal-habal sa nahisgotang lugar.

Si PO2 Marlon Remullo sa Danao Police Station mibutyag sa Banat News nga nahinanok na unta pag-ayo sa katulogon ang biktima dihang gisangpit kini sa usa ka tawo nga dili niya sinati.

 Unya sumala pa sa asawa sa biktima nga nananghid ang maong tawo nga manghuwam og motorsiklo sa biktima nga gi-parking sa ilang tugkaran.

Busa kay nahigmata gumikan sa maong panangpit kaniya, ang biktima dali kaayong mitimbakuwas og bangon dayong gawas sa ilang balay aron unta pagsuta kinsay nanangpit kaniya nga mohuwam sa iyang motor.

Apan matud pa sa asawa nga gisugat kini sa bala gikan sa usa ka armas de fuego sa kriminal nga milanog taliwala sa mingaw nang kagabhion.

Ang asawa sa biktima nga migawas sa ilang balay maoy nakasaksi sa iyang bana nga nahagba sa yuta nga naligo sa kaugalingong dugo niini.

Ang kriminal nawagtang lang usab dayon busa wala kini hiilhi sa asawa sa biktima.

Matud pa ni PO2 Remullo nga   ang biktima samdan sa walang bahin sa dughan kansang bala milapos sa bukobuko niini nga maoy gituohang hinungdan sa   hinanali niyang kamatayon .

Gani hastang tuong kamot sa biktima samdan usab nga gituohan sa kapolisan nga misuway kini og sagang sa bala niadtong gipusil siya.

Sa pagkakaron gipanid-an pa sa kapolisan ang kriminal ug gisuta usab ang hinungdan sa maong pagpamusil.   (BANAT NEWS)