CEBU, Philippines - Ang mga magtutudlo sa kindergarten sa dakbayan sa Mandaue sa dili madugay makadawat na og umento sa ilang binuwan nga suweldo.
Sa pakighinabi sa mga tigbalita kagahapon kang supervisor sa Department of Education (DepEd) Belen Sanoria sa maong dakbayan mibutyag nga ang 27 ka barangay sa Mandaue pulos gyud may mga klase sa kinder o ang gitawag nga pre elementary education sa mga kabataan.
Dugang pa niya nga mikabat sa 90 ka mga magtutudlo ang nagdumala niini nga mao usab ang gidaghanon sa makapahimulos sa maong umento sa suholan sa matag bulan.
Matud pa niya nga ang maong mga magtutudlo maoy nagdumala karon sa 120 ka mga klase nga gilangkoban usab sa kagatusan ka mga kabataan.
Gitataw ni Sanoria nga wala sila makasinati og kakulang sa lawak nga saringan sa maong mga kabataan sanglit gipangandaman kini pag-ayo sa mga opisyal sa lokal nga kagamhanan. (BANAT NEWS)