Bata nakuryentihan patay

CEBU, Philippines - Patay ang usa ka batang lalaki human kini makuryentihe didto sa   sitio Kausmangan barangay Baring, Olango Island sa miaging Sabado sa hapon.

Ang biktima nailhan nga si Stephen Ompad, 9, molupyo usab sa maong lugar.

Sa inisyal nga imbestigasyon sa kapolisan nasayran nga ang biktima misaka sa usa ka kahoy sa Sambag pasado alas 3:00 sa hapon dihang gumikan sa pagka-inosente, ang gikutay nga socket sa bombelya sa sanga sa maong kahoy, iyang giduwaan ug gihimo pang stethoscope, hangtod nga nakuryentihan kini.

Wala na makaabot nga buhi sa tambalanan ang biktima gumikan sa kakusog sa kuryente nga mituhop sa iyang lawas.

Gituohan nga ang maong socket sa sugang dagitabnon gikabit didto sa maong kahoy sukad pa sa miaging pasko ug nakalimtan kini sa pagtangtang. - BANAT NEWS