Mabdos misalig ni Sto. Niño

CEBU, Philippines - Bisan og nagkuray sa uwan, tungod sa dakung pagsalig ngadto sa Santo Niño usa ka mabdos nga deboto sa Balaang Bata uban sa iyang 12-anyos nga anak nga lalaki miuban sa prosisyon niadtong Sabado.

Si An-an Angcos, 36-anyos nga taga barangay Cogon, ning dakbayan sa Sugbo nagkuray tungod sa kabasa niini sa uwan lakip na ang iyang 12-anyos nga anak nga lalaki.

Si Angcos nagkugos kini og dakung imahen sa Santo Niño samtang nagkuyog sa prosisyon.

Gibutyag niya nga batan-on pa siya nga nagdeboto kang Santo Niño ug matag kapistahan niini mokuyog gyud siya sa prosisyon.

Si Angcos upat ka buwan nga mabdos sa ikapito niyang anak ug matud niya nga dugay na kaayo siyang nangandoy nga makabaton og dakung imahen sa Santo Niño aron duna siya’y pas-anon atol sa prosisyon sa kapistahan niini.

Ang maong pangindahay ni Angcos natuman gyud niining tuiga human siya hatagi sa iyang higala og daku kaayong imahen sa Balaang Bata.

Matud ni Angcos nga daghan na kaayo og natabang ngadto sa ilang pamilya ang Santo Niño diin matag dunay personal nga problema sa ilang pamilya sama sa bangi-bangi sa iyang mga igsuon iyaha lang kining i-ampo ngadto sa Balaang Bata ug ang mao niyang yangongo gipamati kini tungod kay mahusay ug magkauliay man sa maayong kabubut-on ang iyang mga igsuon.

Usa sa dakung pagsuway nga naabot sa kinabuhi ni Angcos mao ang kabahin sa iyang ikalimang anak nga si John Niño kinsa nagpanuigon na karon og singko-anyos kinsa nasakit og pneumonia niadtong tulo pa kini ka tuig.

Ang nahisgutang deboto nagkanayon nga wala siya mawagtangi sa paglaom ug kanunay lang gyud siyang nag-ampo kang Santo Niño nga maayo sa maong sakit ang iyang anak ug matud niya nga wala siya hikawi sa Balaang Bata tungod kay naayo sa balatian niini ang iyang anak.

Apan karon si John Niño naghambin kini og laing balatian diin ang testicle niini dunay tubig.

 Gibutyag ni Angcos nga ang maong problema sa iyang anak diha na kini sa iyang pagkahimugso apan karon lang kini mabantayi.

Hinuon sama sa una si Angcos matud niya wala siya mawagtangi sa paglaom nga mamaayo gihapon ang iyang anak tungod sa iyang dakung pagsalig kang Santo Niño nakahibawo siyang dili kini pasagdan.

 Matud niya nga usa sa hinungdan sa iyang pagkuyog sa prosisyon mao nga nangayo siya sa Santo Niño nga tabangan ang iyang anak nga maayo sa balatian niini karon ug dili kini pasagdan atol sa operasyon niini tungod kay ang bata naka-schedule kining operahan. - BANAT NEWS