2 ka pari gikuota'g cellphone

MANILA, Philippines - Duha ka pari nga mitambong sa pontifical mass nga gidumala sa bag-ong arsobispo sa Sugbo nga si Bishop Jose Palma nabiktima sa panguot sa sulod sa simbahan sa Basilica Minore del Santo Niño sa miaging kaadlawon apan usa sa mga suspetsado nga taga Ormoc ang nadakpan.

Ang duha ka mga pari kinsa mihangyo nga dili hinganlan nawagtangan sa ilang mga cellphone.

Samtang ang nadakpang suspek mao si Rodulfo Lauro, 39, nga taga dakbayan sa Ormoc kinsa mihingalan usab sa lain pa niyang duha ka mga kauban nga sila si Ricky Laurente ug Ruel Alba nga pulos usab taga Ormoc apan nakaikyas.

Sa nasayran sa Banat News gikan sa mga guard on duty sa maong simbahan nga ang unang biktima nga pari mibutang sa iyang cell phone sa lingkoranan sa simbahan dihang gikiriw kini sa pilit og kamot nga si Lauro ug mga kauban.

Samtang ang ikaduhang pari kinsa nakaalinggat dayon nga gisurikbot na ang iyang cell phone sa mga kiriwan, dali kaayong nakahiwasa nga maoy nakapalihok dayon sa guwardiya sa simbahan aron pagdakop kang Lauro.

Ang suspetsado mitug-an sa Banat News nga niadto pang Sabado sila nahiabot dinhi sa Sugbo kay mosaksi sa Sinulog.

Nagkagulkol na siya karon sa prisohan sa Theft and Robbery section. - BANAT NEWS