3.5M ang misaksi sa Sinulog - CCPO

CEBU, Philippines - Gibana-bana nga muabot sa 3.5 milyones ka tawo ang mitambong ug misaksi sa Sinulog Grand Parade kagahapon bisan paman sa pagbunok sa kusog nga uwan sumala pa sa kapolisan.

Ang hepe sa kapolisan sa syudad sa Sugbo Sr. Supt. Melvin Ramon Buenafe mibutyag nga bisan sa pag-ulan walay kalainan ug mas daghan pa gani ang mga tawong misaksi kagahapon kumparar sa milabay’ng tuig.

Kagahapon ang mga tawo ini og bunok sa uwan mopasilong lang sa mga establisamento samtang ang uban nagpasinguwan diha sa carousel route ug wala manumbaling sa uwan.

Matud pa ni Buenafe nga bisan ang mga contingents nga misalmot nadugangan usab karong tuiga og di mominos lima ka grupo nga may tag 150 ngadto sa 200 ka miyembro.

Midugang si Buenafe nga wala usab sila makadawat og reports sa mga fraternities nga mimugna og kagubot ug nag-inom daplin sa carousel route atol sa parade.

“So far (hangtud ning pagsulat sa balita), very peaceful and nakikita natin sa mga tao that they are enjoying and in festive mood,” matud pang Buenafe. Samtang sa bahin usab sa hepe sa kapolisan sa Central Visayas Chief Supt. Ager Ontog Jr. mipadayag nga ‘generally peaceful’ ug wala silay nadawat nga reports nga kagubot kagahapon.

Matud pa ni Ontog nga aduna silay nadawat nga reports kalabot sa mga armas diin iya kini nga gikalipay nga aduna gyuy mga concerned citizen nga adunay pagpakabana sa katilingban.

Mibutyag usab si Ontog nga mao kini ang labing unang higayon nga siya misaksi sa maong kalihukan ug iya kini nga gihulagway nga usa sa mga pinaka-organisadong festival nga iyang natambongan.

“Dito may kaayusan talaga at ‘yung religious at cultural aspect ay naghahalo at naging maganda dito,” pasabot pa ni Ontog.

Kagabii laing grupo sa mga polis usab ang gidugang ni Ontog nga mobantay sa mga night spots nga maoy sagad adtuon sa mga tawo ini og kahuman sa parada.

Sa laing bahin, gibutyag usab ni Ontog nga wala sila maglisod sa diha nga naabot na ang presidente bisan paman og wala kini magwangwang kini tungod kay aduna na silay gihimo nga plano kalabot sa pag-abot niini. - BANAT NEWS